BE mund të marrë përsipër median e financuar nga shteti amerikan

BE-ja do të diskutojë mënyrat për të ndihmuar Radio Evropa e Lirë/Radio Liberty (RFE/RL) e financuar nga shteti amerikan të qëndrojë në këmbë tani që Presidenti Donald Trump ka shkurtuar buxhetin e saj, ka thënë kryediplomati i bllokut, Kaja Kallas.

Radio Evropa e Lirë u themelua gjatë Luftës së Ftohtë për të përhapur propagandën pro-perëndimore në Bllokun Lindor. Organizata fillimisht u financua nga CIA dhe vazhdon të marrë grante të Kongresit të SHBA.

Një gazetar pyeti Kallas pas takimit të Këshillit të Punëve të Jashtme në Bruksel të hënën nëse BE do të ofronte "mbrojtje të përkohshme" për gazetarët rusë të cilëve u ishin ndërprerë kontratat. Ajo argumentoi se transmetimet e Radios Evropa e Lirë gjatë Luftës së Ftohtë ishin "shumë të dobishme". 

“Është e trishtueshme të dëgjosh se SHBA po tërheq fondet. Tani pyetja për ne është, a mund të hyjmë me fondet tona për të mbushur boshllëkun?” ka thënë Kallas. “Përgjigja për këtë pyetje është… jo automatikisht sepse ne kemi shumë organizata që vijnë me të njëjtën kërkesë.”

“Por ka pasur me të vërtetë një shtysë nga ministrat e jashtëm për të diskutuar këtë dhe për të gjetur një mënyrë, kështu që kjo është [detyra] e palës sonë për të parë se çfarë mund të bëjmë,” shtoi ajo. 

Komisioni Evropian dhe zyrtarë nga vendet anëtare të BE-së kanë dënuar vendimin e Trump për të ndërprerë shërbimet në agjencinë e lajmeve.

Ministri i Jashtëm çek Jan Lipavsky shkroi në X javën e kaluar se ai do të diskutonte mundësinë që "të paktën pjesërisht të ruheshin transmetimet e tij".