Meteorologia Gjoni: Sot reshje të dobëta shiu, nga java tjetër dëborë në disa qarqe të vendit

Si do të jetë moti gjatë dy javëve në vijim? 

Meteorologia Anira Gjoni, për shikuesit e programit të mëngjesit, solli parashikimin zyrtar nga IGJEUM.

Sipas saj, ditën e sotme priten reshje të dobëta shiu, të cilat do të jenë lokale dhe jo problematike për nga sasia. 

Temperaturat sot dhe nesër do të shënojnë një rritje prej rreth 2 °C. Këto vlera do të mbeten relativisht të qëndrueshme edhe gjatë fundjavës. 

Ndërsa nga java e ardhshme parashikohet një ndryshim i dukshëm i kushteve atmosferike. 

Priten rënie e temperaturave, duke nisur nga mesi i javës së ardhshme.

Me uljen e temperaturave, nga e mërkura e javës tjetër priten reshje dëbore në zonat lindore dhe juglindore të territorit, të cilat mund të shtrihen deri në zonat malore përreth Tiranës, përfshirë edhe malin e Dajtit. 

IGJEUM parashikon se reshjet do të vijojnë të jenë të dobëta dhe të shpërndara, pa problematika të theksuara, ndërsa vëmendja kryesore do të jetë te rënia graduale e temperaturave në ditët në vijim.