SPAK kërkesë për arrestimin e Ahmetaj, Hoxha: Nuk është në Shqipëri, është larguar drejt një vendi të BE

Gazetari investigativ Artan Hoxha i ftuar në emisionin Të Paekspozuarit në MCN TV ka komentuar lidhur me akuzat dhe kërkesën e SPAK drejtuar Kuvendit për arrestimin e ish.zvkryeministrit Arben Ahmetaj. Hoxha deklaroi se Ahmetaj nuk ndodhet në territorin e Shqipërisë dhe se ai është larguar drejt një vendi fqinj dhe e ka kaluar kufirin ditën e premte. "Gjatë ditës së sotme, që nga momenti kur doli lajmi se kërkesa e SPAK i është drejtuar Kuvendit për imunitetin e Ahmetajt, pyetja e parë dhe verifikimi i parë që tentuam të bënim ishte vendndodhja e zotit Ahmetaj. Nga kontakti që kam patur sot, më rezulton që ai nuk është në Shqipëri, por këtë do ta shohim nesër, kur ai do të duhet të paraqitet në zyrat e Kuvendit, gjatë kohës që do të merret në shqyrtim. Të premten ai ka lëvizur nga Shqipëria. Është regjistruar në sistemin TIMS. Ka kaluar me pasaportë të Shqipërisë dhe ka lëvizur drejt një vendi të BE, në kufi me Shqipërinë”. Në vijim ai theksoi se sot u tha që Ahmetaj është brenda territorit, por Hoxha u shpreh se ka ndjekur me vëmendje, reagimin e avokatit dhe kjo mbetet të verifikohet nesër. “Në rastet e mëparshme kemi parë që kur kërkesa u është drejtuar Kuvendit, ata janë paraqitur në seancë. Nuk do të çuditesha nëse Ahmetaj nuk paraqitet. Nëse ndjekim precedentët e tjerë, të zotit Koka dhe Bllako. Zoti Koka ka dy vjet aty në burg dhe nuk është marrë asnjëherë në pyetje. Ka dy vjet brenda. Ai nuk iu fsheh arrestimit edhe pse u njoftua përpara. Ka dy vjet dhe nuk ka një vendim gjykate të shkallës së parë”.