Një i kërkuar nga policia, me dyshimin për përfshirje në vrasjen e politikanit serb të Kosovës, Oliver Ivanoviç, është zgjedhur të hënën në krye të të ashtuquajturës Federata e Futbollit për Kosovën dhe Metohinë, një institucion paralel i kontrolluar nga Beogradi që vepron ilegalisht në Kosovë.
Ish-zv.ministri i Jashtëm i Kosovës, Petrit Selimi, në një postim në Tuiter e quan këtë një akt skandaloz në shkelje të rregullores së UEFA-s.
“Federata serbe e Futbollit organizon zgjedhje të paligjshme në “Shoqatën e Fotbollit për Kosovën dhe Metohinë” dhe zgjedh një të dyshuar për vrasje si “president”, në shkelje flagrante të rregullave të UEFA-s. Ky është një provokim i hapur për Federatën e Futbollit në Kosovë, anëtare e UEFA-s dhe FIFA-s”, shkruan Selimi.
Milan Radoiçiç, serb i Kosovës, u zgjodh president i kësaj federate të hënën. Radoiçiç kërkohet nga Policia e Kosovës, pasi dyshohet se është përfshirë në vrasjen e udhëheqësit serb të Kosovës, Oliver Ivanoviç, në janar 2018. Radoiçiç, i cili është gjithashtu nënkryetar i Listës Serbe, një subjekt politik që përfaqëson serbët në Kosovë, nën kontrollin e Beogradit, aktualisht po fshihet në Serbi. Javën e kaluar, ai është parë teksa ndiqte një takim ku ishte i pranishëm presidenti serb, Aleksandar Vuçiç. Federata e Futbollit e Kosovës njoftoi se do të paraqesë një ankesë zyrtare me UEFA dhe FIFA kundër këtij veprimi.
Serbët e Kosovës vazhdojnë të sfidojnë Federatën e Futbollit të Kosovës (FFK), pothuajse tre vjet pas anëtarësimit të saj në UEFA dhe FIFA.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
