Me rastin e Ditës Globale të Zgjedhjeve, më 4 Shkurt 2021, Komisioni Qendror i Zgjedhjeve (KQZ) dhe Prezenca e OSBE-së në Shqipëri organizuan një seri aktivitetesh përqendruar rreth votuesve të rinj, me qëllim për të rritur pjesëmarrjen e tyre në zgjedhje.
Prezenca e OSBE dhe KQZ-ja ftuan të rinj nga i gjithë vendi për të krijuar video dhe slogane për zgjedhjet e përgjithshme të 25 Prillit. Me këtë rast u shpërblyen katër fituesit e konkursit, në një ceremoni të organizuar nga Komisioneri Shtetëror për Zgjedhjet Ilirjan Celibashi dhe Shefi i Prezencës Vincenzo Del Monaco.
“Përfshirja e të rinjve përmes konkursit për videon, grafikën dhe sloganin më të mirë për zgjedhjet në celebrimet e Ditës Botërore të Zgjedhjeve, ishte një rast i mirë për të përcjellë mesazhe për angazhimin e të rinjve në procesin zgjedhor dhe të marrin pjesë në votime”, tha Komisioneri Celibashi gjatë vlerësimit të të rinjve që morën pjesë në konkurs.
“Angazhimi i të rinjve në proceset demokratike është një përbërës i rëndësishëm i punës së Prezencës së OSBE-së. Të rinjtë duhet të shkojnë të votojnë Ditën e Zgjedhjeve, të bëhen pjesë e procesit. Ju keni një rol të fortë në të ardhmen e vendit, bëjeni zërin tuaj të dëgjohet”, tha ambasadori Del Monaco gjatë bisedës me të rinjtë
Celibashi dhe Del Monaco shfrytëzuan rastin për të nxitur të gjithë votuesit të kontrollojnë emrat e tyre në listat e votuesve dhe të kenë një dokument të vlefshëm identifikimi për të qenë në gjendje të votojnë në 25 Prill.
Prezenca e OSBE i dhuroi poashtu KQZ-së, 700 kopje të shtypura të Kodit Zgjedhor të ndryshuar së fundmi për të ndihmuar komisionerët e zgjedhjeve në organizimin dhe administrimin e zgjedhjeve të ardhshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
