Pakujdesia është shkaku kryesor i zjarreve që kanë rënë javët e fundit brenda territorit të Bashkisë së Tiranës. Në një intervistë në studion e lajmeve në TvT, Shkëlqim Goxhaj, drejtor i Shërbimit Zjarrfikës, tha se nga mesi i muajit korrik ka pasur mesatarisht 5-6 vatra zjarri në ditë. Të gjitha këto, përveç rastit të para disa ditëve në Kombinat, kanë ardhur për shkak të pakujdesisë.
Sipas Goxhajt, krahasuar me vitet e mëparshme, ky fenomen ka ardhur duke u tkurrur.
“Rastet varen nga thatësira dhe faktorë të ndryshëm natyrorë. Në vite të ndryshëm, kemi numra të ndyshëm. Në 2017 ka pasur rekord zjarresh. Numri ka ardhur duke u ulur. Zjarret vijnë nga pakujdesia. Qytetarët duhet të tregohen të kujdesshëm. Nuk duhet të përdorin zjarrin për asnjë lloj nevoje”, tha ai.
Sa u takon zjarreve në mjedise të mbyllura, Goxhaj tha se numri më i madh i rasteve ka në origjinë bombolat e gazit. Në këtë pikë, ai bëri apel për mospërdorimin më shumë se një herë të bombolave 5-litërshe me ngjyrë portokalli, të cilat janë prodhuar për t’u përdorur kryesisht në kampingje dhe janë njëpërdorimshe.
“Në banesa problemet kryesore janë energjia elektrike dhe përdorimi i gazit të lëngshëm. Sidomos ky i fundit, ka pasur shfaqje të zjarreve në banesa nga rrjedhja e gazit të lëngshëm. Bombolat e gazit duhet të mbushen në pikat e licencuara dhe jo në autogaze, sepse këto të fundit nuk ofrojnë garanci. Bombolat e gazit me kapacitet 5 litër janë njëpërdorimshe. Ngjarjet me bombola në 95% të rasteve janë të kësaj natyre”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
