Marko Gjuriç, drejtori i Zyrës për Kosovën në Qeverinë e Serbisë, thotë se pavarësisht deklaratave të kryeministrit të Kosovës, Avdullah Hoti, Serbia kurrë nuk do ta njohë pavarësinë e saj. Sipas Gjuriçit, Hoti qëllimisht po mashtron opinion vendor dhe atë ndërkombëtar se të enjten kur palët të takohen sërish, do të flitet për marrëveshjen e ‘njohjes së Kosovës së shpallur në mënyrë të njëanshme’.
“Hoti mund vetëm të ëndërrojë njohjen e pavarësisë së Kosovës, dhe çdo ditë është më larg saj. Ai dhe Isa Mustafa mund t’ia njohin vetëm njëri-tjetrit,”- tha Gjuriç.
Sipas gazetës Beta, Gjuriç ka thënë se “në takimin e Brukselit të enjten, në rend të ditës fillimisht do të jenë detyrimet e Prishtinës të marra përgjatë dialogut të deritashëm në Bruksel, pastaj përpjekja për normalizimin e bashkëpunimit ekonomik, sepse kjo është ajo që shqetëson njerëzit e zakonshëm, si dhe çështja e personave të zhdukur, që është një borxh ndaj familjeve të viktimave”.
Më herët, kryeministri i Kosovës, Avdullah Hoti, tha se diskutimet Kosovë-Serbi që ka nisur në Bruksel nuk janë të karakterit teknik, por politik. Ndërsa sot, pas takimit me kryetarin e PD-së Lulzim Basha, Hoti tha se të enjten në Bruksel do të udhëtojë koordinatori i Qeverisë së Kosovës për procesin e dialogut.
“Ky proces ka filluar pas më shumë 20 muajsh. Ditët e para e kemi qartësuar platformën tonë dhe kemi komunikuar me të gjithë. Është etabluar pozicioni i Kosovës në këtë proces dhe është mirëkuptuar nga partnerët tanë ndërkombëtarë. Qëllimi final është vetëm njohja reciproke dhe normalizimi i marrëdhënieve. Dialogu është vetëm politik. Të enjten është një takim në Bruksel ku do të jetë Koordinatori për Dialog – të cilin do ta emëroj së shpejti – për të draftuar marrëveshjen finale për njohje reciproke”, ka deklaruar Hoti.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
