Rusia akuzon Ukrainën: Deri në 1 milion dollarë për ushtarët që të braktisin frontin

Shpërblime deri në një milion dollarë për ushtarët rusë që braktisin frontin në Ukrainë.

Ky është propozimi i Kievit për ushtrinë e Moskës të vendosur në provincën lindore të Donetskut.

Akuza vjen nga Shërbimi Federal i Sigurisë i Kremlinit (FSB), agjentët e të cilit dyshohet se ndaluan një operacion ukrainas i cili synonte të shpërblente rusët që zgjedhin të braktisin pozicionet e tyre në qytetin e Gorlovka.

“Synimet e Drejtorisë kryesore të Inteligjencës të Ministrisë së Mbrojtjes të Ukrainës u identifikuan shpejt nga shërbimet e kundërzbulimit ushtarak të FSB-së”, tha agjencia, duke shtuar se agjentët arritën të merrnin rreth 97.050 euro nga Kievi si “paradhënie”.

FSB nënvizoi gjithashtu se gjatë aktiviteteve operacionale, ishin vendosur zona të përqendrimit të njësive të Forcave të Armatosura të Ukrainës, të cilat i lejuan ushtrisë ruse të kryente sulme parandaluese me raketa dhe artileri në rrugët e identifikuara të lëvizjes.

“Armiku pësoi humbje të konsiderueshme njerëzore dhe materiale,” tha FSB, duke shtuar se fondet e supozuara të dorëzuara nga Kievi u përdorën për të blerë pajisje dhe burime teknike për të mirën e njësive që merrnin pjesë në operacionin ushtarak special.

Presidenti ukrainas Volodymyr Zelensky ka propozuar ndërkohë që Perëndimi të blejë armë nga Ukraina me rreth 250 miliardë dollarë që vijnë nga asetet e ngrira ruse.