Forcat e Armatosura të Shqipërisë janë vendosur mbrëmjen e së premtes në Kukës, duke qëndruar në gatishmëri për të ndërhyrë në Kosovë nëse përkeqësohet situata nga përmbytjet.
Lajmin e ka bërë me dije ministri i Mbrojtjes, Niko Peleshi, nëpërmjet një postimi në Facebook.
“Forca dhe mjete nga FA janë dislokuar në Kukës, në gatishmëri për të mbështetur banorët e disa prej komunave në Kosovë, të cilat janë prekur nga përmbytjet si pasojë e reshjeve të dendura ditët e fundit. Të gatshëm të ndërhyjmë në koordinim me autoritetet e Kosovës, në rast të përkeqësimit të situatës.
Me vëllezërit tanë në ditë të mira dhe të vështira”, ka shkruar Peleshi.
Disa qytete në Kosovë u përballën orët e fundit me vërshime uji si pasojë e reshjeve të dendura të shiut. Qyteti më i prekur është Skenderaj, ku autoritetet lokale kanë shpallur gjendje emergjente. Probleme ka pasur gjithashtu dhe në Vushtri, Pejë dhe në disa zona të tjera të vendit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
