Del në ankand bari i jahtit të Hitlerit

Një bar gjigant alumini në formë globi, që i përkiste jahtit të Hitlerit 'Aviso Grille', do të dalë në ankand në Maryland për rreth 250 000 dollarë.

Alexander Historical Auctions e përshkruan atë si “një relike fantastike, simbol i madhështisë së rreme dhe luksit të tepruar të Rajhut”. Bari ka qëndruar i fshehur për mëse 70 vjet në një hambar.

Anija e Hitlerit u ndërtua në vitin 1935 dhe jetoi katër vjet më shumë se vetë Furheri. Bari i saj u shpëtua kur anija u çmontua në një kantier detar në lumin Delaware në 1951.

Ky ishte një fund i trishtë për jahtin me të cilin Hitleri donte të lundronte në Tamiz nëse arrinte të pushtonte Britaninë. Metali i ishte shitur ushtrisë amerikane, por, sipas shtëpisë së ankandeve, bari përfundoi në duart e një shoku të pronarit të kantierit, djali i të cilit e mbajti atë.

Identiteti i pronarit aktual nuk u zbulua, por shtëpia e ankandeve citoi një deklaratë prej tij: "Babai im - tha ai - ishte një mik i ngushtë i pronarit të kantierit, i cili e ftoi atë personalisht dhe i dha mundësinë për të blerë lokalin".