Në autobusin që vinte nga Italia, sekuestrohen 500 mijë euro në Portin e Durrësit

Një shumë prej rreth 500 mijë euro janë sekuestruar në një autobus në Portin e Durrësit.

Burime bëjnë me dije për MCN se janë gjetur gjatë kontrollit të një autobusi që ndodhej në tragetin që vinte nga Bari në Itali.

Numërimi i parave vijon, ndërsa autobusi aktualisht mbahet i bllokuar në pikën e dytë të kontrollit në portin e Durrësit.

Mësohet se janë shoqëruar disa persona dhe po vijon puna për identifikimin e kapjen e  personave të përfshirë. 

Njoftimi i policisë:  Durrës/Informacion paraprak. 

Në portin e Durrësit, si rezultat i një hetimi njëmujor të kryer nga Policia Kriminale e DVP Durrës, për mundësinë e futjes së një shume të madhe eurosh në vendin tonë, nëpërmjet portit të Durrësit, gjatë ditës së sotme, në kuadër të operacionit policor të koduar “Eurot”, është ushtruar kontroll i imtësishëm nga Seksioni kundër Krimit Ekonomik dhe Financiar i DVP Durrës. 

Si rezultat i informacioneve dhe konrollit të imtësishëm, në pjesën e sipërme të një autobusi janë gjetur të fshehura 6 qese plastmasi, brenda të cilave kishte disa pako, me rreth 500 000 euro. 

Nga Policia e DVP Durrës janë shoqëruar disa persona dhe vijon puna për numërimin e saktë të sasisë së eurove dhe për identifikimin e kapjen e  personave të përfshirë. 

Në përfundim të veprimeve do të japim informacion të plotë.