Gazetari Xhevahir Zhabina tha në MCN Tv se pozita e Erion Veliajt është rënduar me vendimin e Apelit të GJKKO lidhur me masën e sigurisë për kryebashkiakun.
Gjyqtari Engert Pëllumbi argumenton ndër të tjera se ka tipare që përputhen me një “grup të strukturuar kriminal”.
Sipas Zhabinës ka një përplasje mes SPAK-ut dhe GJKKO-së në hetimet paraprake, pasi nuk është hera e parë që gjykata sugjeron hetime në kuadër të grupit të strukturuar kriminal.
“Mendoj që pozita e z.Veliaj me vendimin e Apelit është rënduar më shumë se sa me vendimin e Gjykatës së Shkallës së Parë, kjo për faktin se gjyqtari ka sugjeruar që ai të hetohet, së bashku me bashkëshorten dhe Abulen si grup i strukturuar kriminal. Gjyqtari ka argumentuar disa arsye pse z.Veliaj s’duhet t’i ndryshohet masa. Fakti që z.Veliaj ka kontaktuar oficerin e BKH gjatë hetimit ka rënduar pozitën e tij.
Ka rrezikun që provat të mos merren nëse Veliaj qëndron i lirë, ose të jenë të dëmtuara apo të helmuara, thotë gjyqtari në vendimin e tij. Ajo që ka një rëndësi në argumentin e gjyqtarit, ‘këta persona e kanë ideuar për një kohë të gjatë këtë skemë, dhe nëse qëndrojnë të lirë, është e vështirë që të ndalet.
Veliaj mban ende pozitën e kryebashkiakut dhe kush e siguron gjyqtarin që Veliaj s’do vazhdojë të kryejë një vepër penale më të rëndë se kjo’, janë disa nga arsyet e renditura në hetim. Shoh që ka një lloj përplasje mes SPAK-ut dhe GJKKO-së gjatë hetimeve paraprake. Nuk është hera e parë që GJKKO i sugjeron SPAK-ut që të bëjë hetime në kuadër të grupit të strukturuar kriminal. Prokuroria ose po kursehet ose do ta ngrejë në një fazë tjetër këtë akuzë”.
Zhabina foli edhe mbi mbështetjen OSBE-ODIHR për SPAK-un, e cila sipas tij është më shumë teknike.
Sipas gazetarit krimet zgjedhore janë një test shumë i rëndësishëm për SPAK-un.
“Bëhet fjalë për një mbështetje teknike të OSBE-së për SPAK-un, kryesisht laptop, printera, që do t’i duhen Task-Forcës që do hetojë krimet zgjedhore, dhe është shpërndarë në të gjitha qarqet. Janë britanikët që kanë asistuar dhe kanë ndihmuar SPAK-un për të ngritur këtë strategji. Shihet si mbështetje teknike më shumë se hetimore. Zakonisht krimet zgjedhore ndodhin para ditës së zgjedhjeve.
Janë struktura që partitë dhe personazhe të ndryshme i ngrenë para zgjedhjeve. SPAK-u duhet të eci me këmbët e veta, dhe krimet zgjedhore janë një test shumë i rëndësishëm për SPAK-un, që ka marrë garancinë që do t’i hetojë dhe s’do ketë asnjë pengesë për t’i hetuar”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
