Kim Kardashian zyrtarisht beqare

Kim Kardashian është sërish beqare pas gati tetë vitesh martesë me Ye, i njohur më parë si Kanye West.

Në një seancë gjyqësore virtuale të mërkurën, ylli i reality show hoqi zyrtarisht dhe ligjërisht "West" nga mbiemri i saj.

Kardashian, e cila bëri kërkesën për divorc nga reperi vitin e kaluar, e bëri kërkesën në dhjetor për t'u bërë ligjërisht beqare.

Ish-çifti duhet të zgjidhë ende ndarjen e pasurisë dhe kujdestarinë e katër fëmijëve të tyre.

Vendimi i së mërkurës - pranimi i kërkesës së Kardashian për një "divorc të dyfishtë" - do të thotë se procedurat e divorcit do të ndahen në dy pjesë: e para do të zgjidhë emrin e saj ligjor dhe statusin martesor dhe pjesa e dytë që përfshin kujdestarinë dhe asetet financiare.

Në disa deklarata të dorëzuara që nga dhjetori, bukuroshja 41-vjeçare tha se dëshironte "shumë" përfundimin e martesës së saj.

"Unë besoj se gjykata që ndërpret statusin tonë martesor do ta ndihmojë Kanye të pranojë se marrëdhënia jonë martesore ka marrë fund," shkroi ajo në një deklaratë muajin e kaluar.

Ye, 44 vjeç, i cili nuk ishte i pranishëm në seancë, kishte luftuar publikisht ndarjen dhe kishte apeluar që Kardashian të kthehej në martesën e tyre.

Në seancën e së mërkurës, një avokat i Ye kërkoi një marrëveshje nga Kardashian për të hequr dorë nga çdo privilegj martesor që mund të kishte me një bashkëshort të mëvonshëm.

Kardashian dhe avokati i saj e quajtën këtë veprim "të paprecedentë" dhe u mohua nga gjyqtari. Ish-çifti filloi lidhjen në vitin 2012 dhe u martua dy vjet më vonë.