Ambasadorja kroate në Prishtinë, Marija Kapitanovic deklaroi se Kroacia ofron përkrahje të vazhdueshme si rreth anëtarësimit në NATO, ashtu edhe integrimit në Bashkimin Evropian.
Ajo i bëri këto komente gjatë takimit me ministrin e Forcës së Sigurisë së Kosovës, Haki Demolli. Ky i fundit tha se bashkëpunimi dypalësh me Kroacinë në fushën e sigurisë ka qenë jashtëzakonisht produktiv, dhe se shteti kroat dhe Ministria e Mbrojtjes së Kroacisë kanë dëshmuar se mbështesin plotësisht përpjekjet e shtetit të Kosovës për konsolidimin dhe avancimin e institucioneve të sigurisë të Koosovës.
Demolli falënderoi ambasadoren Kapitanovic dhe gjeneralin Beretin për vizitën dhe gatishmërinë e tyre për shkëmbim përvojash në fushën e inspektoratit, si dhe për mbështetjen që vendi i tyre ka ofruar në vazhdimësi për FSK-në dhe angazhimet rajonale dhe ndërkombëtare.
Ambasadorja e Kroacisë, Kapitanovic tha se Kroacia dhe Kosova po zhvillojnë dhe ndërtojnë marrëdhënie të shkëlqyera dhe se marrëdhëniet më intensive i kanë pikërisht në fushën e mbrojtjes dhe të sigurisë. Ambasadorja tha gjithashtu se vendi i saj ka kaluar nëpër të njëjtat vështirësi dhe situata, si dhe ka kaluar të njëjtën përvojë dhe për këtë Kapitanovic tha se vendi i saj është angazhuar dhe do të angazhohet që shteti i Kosovës të mos ketë pengesa të natyrës që Kroacia i ka kaluar më parë.
Ambasadorja Kapitanovic në fund tha se Kroacia ofron përkrahje të vazhdueshme si rreth anëtarësimit në NATO, ashtu edhe integrimit në Bashkimin Evropian. “Jemi zëri juaj më i fuqishëm në Bruksel”, tha ajo.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
