Princ Harry gati për librin e jetës së tij

Princ Harry do të ndajë "gabimet dhe mësimet e marra" gjatë jetës së tij në një libër kujtim që do të botohet vitin e ardhshëm.

Duke njoftuar marrëveshjen me botuesit Penguin Random House, Princi Harry tha se ai do të reflektonte "nivelet e larta" dhe të ishte "i saktë dhe plotësisht i vërtetë".

Harry, i cili së bashku me gruan e tij Meghan u tërhoq nga detyrat mbretërore vitin e kaluar, do të dhurojë të ardhurat për bamirësi.

BBC-së i është thënë që duka kohët e fundit ka folur privatisht me familjen e tij rreth shkrimit të librit.

Një zëdhënës i dukës shtoi se ai nuk do të pritej të merrte leje për projektin nga Pallati Buckingham. Ata nuk dhanë detaje shtesë mbi atë pjesë të të ardhurave që do të dhurohej për bamirësi.

Dhe Penguin nuk bëri të ditur kushtet e marrëveshjes së saj, e cila përfshin një libër audio dhe të drejtat ndërkombëtare.

Duka, 36 vjeç, tha në një deklaratë: "Unë po e shkruaj këtë jo si princi që kam lindur, por si njeriu që jam bërë. Shpresa ime është që në tregimin e historisë sime - ngritjet dhe uljet, gabimet, mësimet e marra - unë mund të ndihmoj të tregoj se pavarësisht se ku dhe nga vijmë, ne kemi më shumë të përbashkëta sesa mendojmë. Jam thellësisht mirënjohës për mundësinë për të treguar atë që kam mësuar gjatë jetës time deri më tani dhe i ngazëllyer që njerëzit të lexojnë një tregim të dorës së parë të jetës time që është i saktë dhe plotësisht i vërtetë."

Markus Dohle, nga Penguin Random House, e përshkroi dukën si midis "udhëheqësve, ikonave dhe krijuesve të ndryshimeve me famë botërore, të cilët ne kemi qenë të privilegjuar t'i botojmë gjatë viteve".

Një njoftim për shtyp e përshkroi librin si "intim dhe të përzemërt" dhe "të ndershëm dhe prekës".

Harry dhe Meghan, tani jetojnë në SH.B.A. me djalin e tyre dy-vjeçar Archie dhe vajzën e tyre Lilibet, e cila lindi në Kaliforni në 4 Qershor.