Ushtria ruse ka vrarë tre punëtorë të termocentralit bërthamor në Zaporizhzhia dhe ka arrestuar 26 të tjerë gjatë pushtimit të objektit, tha të mërkurën komisioneri i parlamentit ukrainas për të drejtat e njeriut, Dmytro Lubinets.
Sipas Lubinets, tre punëtorët u vranë nga rrahjet ose granatimet, ndërsa Rusia i akuzon të arrestuarit për "përcjellje të informacionit për lëvizjen dhe vendndodhjen e pajisjeve ushtarake ruse" në rajon.
"Ky është termocentrali ukrainas ku punojnë inxhinierët bërthamorë ukrainas, të cilët janë të lirë të komunikojnë me këdo që mund të sigurojë ruajtjen e integritetit të termocentralit bërthamor," tha Lubinets, duke shtuar se "dhjetra njerëz u rrëmbyen" dhe fati i tyre mbetet i panjohur.
Presidenti i SHBA Joe Biden dhe udhëheqësit perëndimorë kanë theksuar nevojën që mbikëqyrësi bërthamor i Kombeve të Bashkuara të vizitojë uzinën në Ukrainën juglindore, ku bombardimet kanë ngjallur frikën e një katastrofe.
Kievi dhe Moska kanë bërë një breshëri akuzash kundër njëri-tjetrit për sigurinë dhe veprimet ushtarake në dhe rreth centralit, kompleksi më i madh bërthamor në Evropë.
Por mungesa e aksesit të pavarur në centralin, i cili është pushtuar nga forcat ruse që nga marsi, e bën të pamundur verifikimin e asaj që po ndodh atje.
Lubinets i bëri thirrje gjithashtu OKB-së dhe Agjencisë Ndërkombëtare të Energjisë Atomike që të përshpejtojnë krijimin e zonës së çmilitarizuar rreth uzinës dhe të shtojnë mbrojtje për personelin e saj për të siguruar mirëmbajtjen e objektit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
