Tërmetet e vitit të kaluar dhe pandemia nuk e gjunjëzuan tregun e sigurimeve shëndetësore dhe pronës private, ndonëse pati vështirësi të mëdha. Për banesat e dëmtuara nga tërmeti, kreu i Shoqatës së Sigurimeve, Edvin Libohova, thotë për TvT se janë kompensuar 70% e tyre, teksa pjesa tjetër mbetet në pritje.
Janë paguar mbi 400 milionë lekë të reja për rastet e konstatuara në tërmetin e 21 shtatorit. Ndërsa për tërmetin e 26 nëntorit fatura ka vajtur mbi 2.2 miliardë. Dëmi potencial i përballur me tregun e sigurimeve llogaritet në 4.1 - 4.2 miliardë lekë ose 33 milionë euro, nga të cilat mbi 70% janë paguar, por ka edhe dëme në proces që duan analiza e vlerësime dhe kompletim dokumentacioni.
Ndërsa gjatë pandemisë një pjesë e mirë e drejtuesve të automjeteve shtynë sigurimin, Libohova thotë se 22% e mjeteve në Shqipëri lëvizin pa këtë dokumentacion përkatës.
Në Shqipëri qarkullojnë mjete të pasiguruara, rreth 22 % e totalit. Në Europë jemi vendi me numrin më të lartë të mjeteve të pasiguruara. Këto mjete janë shkaktarët e shumë dëmeve që mbulohen nga Fondi i Kompensimit pranë Byrosë Shqiptare Motorike dhe fatura e tyre ka shkuar rreth 18 milionë euro.
Pandemia dhe tërmeti nuk e kanë ndryshuar ende kulturën e shqiptarëve për sigurimin e pronës dhe shëndetit. Qytetarët thonë se paguajnë vetëm për sigurimet e detyrueshme.
Sipas një raporti nga Autoriteti i Mbikëqyrjes Financiare ngjarjet e tërmeteve nxorrën në pah domosdoshmërinë e zgjerimit të mbullimit të sigurimit të pronës, duke qenë se vetëm 2.5% e banesave kanë një mbulim të tillë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
