Avokati Redon Meksi, në një prononcim për edicionin informativ të MCN TV, ndau për shikuesit përvojën e tij si pushues në rivierën shqiptare, duke u ndalur këtë herë në plazhin e Drimadhes.
Sipas Meksit, Drimadhja rezulton të jetë një ndër plazhet me çmimet më të larta që ka vizituar deri më tani në jugun e vendit.
Ai thekson se rritja e çmimeve këtë vit është mbi 10% krahasuar me sezonin e kaluar.
Nuk ka asnjë hapësirë publike. Hotelet janë dukshëm më të shtrenjta se në zona të tjera dhe çdo produkt kushton më shumë. Është plazhi më i shtrenjtë që kam frekuentuar deri tani.
Në zonë ka fluks investimesh në beton, ndërkohë që mungon infrastruktura bazë për të përballuar zhvillimin që po ndodh.
Nga fundi i Llogarasë deri në Drimadhë sheh vetëm vinça dhe ndërtime pa fund. Është për të ardhur keq që një vend kaq i bukur po dëmtohet në këtë mënyrë.
Meksi tregoi gjithashtu për vështirësinë që pati në gjetjen e një shezlongu pasditeve, për të cilin iu kërkuan 25 mijë lekë të vjetra, çmim që më pas u ul në 20 mijë.
"Pas orës 16:00 shezlongët janë bosh, por çmimi mbetet i lartë, shkuam për të marrë një shezlong dhe ishte 25 mije lekë të vjetra, nuk ka kuptim në këtë orë kur nuk ka njerëz, ti bosh e ke, ta mbash me atë çmim, dhe na uli e 20 mijë lekë. " – tha ai, duke shtuar se aktualisht po qëndron në një kamping për shkak të kostove të larta të akomodimit.
Sipas tij, për pushuesit e shtresës së mesme, Drimadhja është një destinacion që kërkon “shtrëngim të fortë të rripit”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
