Gjuhëtari Rami Memushaj duke folur në emisionin “Arnautistan” në MCN TV theksoi nevojën për vendosjen e redaktorëve në institucionet qeveritare si dhe në televizione. Po ashtu ai hodhi idenë që punonjësit e administratës shtetërore duhet të japin si provim gjuhën shqipe. Ndër të tjera Memushaj tha se folësit televiziv po thyejnë strukturat e gjuhës shqipe.
Duhet të vendosen redaktorë në TV, në institucione qeveritare, bashki, ministri. Gjithë kjo masë njerëzish që punon në administratën shtetërore duhet të japë si provim gjuhën shqipe. Shkolla e bën një fare pune. TV dhe radiot prishin punën e shkollës. Folësit televiziv po thyejnë strukturat e shqipes. Emrat e huaj nuk i lakojnë, por kanë filluar edhe fjalët shqip të mos i lakojnë. Po preket sistemi emëror. Shqipja ka sintaksë dhe morfologji të veçantë, që emrin e lakon. Shqipja të gjitha fjalët i lakon, sepse lakimi ruan edhe strukturën ritmike të fjalës. Janë me dhjetëra televizione dhe janë shumë gazetarë që s’kanë formimin e duhur gjuhësor. Gazetarët kanë nevojë në redaksi të kenë manualet kryesore, fjalorin e gjuhës shqipe, fjalorin drejtshkrimor. Rrjeteve sociale s’ke çfarë u bën, janë të pakontrollueshme. Mua s’më pëlqen as kjo Live, ne kemi drejtpërdrejtë, pse akses, kur mund të themi qasje, pse tentoj kur mund të themi përpiqem. Këto e bëjnë ligjërimin të bukur”.
I pyetur nga moderatori Nano nëse është i përfshirë në fjalorin e ri të shqipes, Memushaj tha:
Nuk jam i përfshirë te nisma për fjalorin e ri. Ka një defekt që s’ka korpus. Fjalori i 80-ës është bërë me skeda, me 5 milionë skeda. Kanë kaluar 40 vjet dhe shqipja është pasuruar shumë. Te varianti i ri që po përgatitet janë 90 mijë fjalë”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
