Qindra qytetarë i janë përgjigjur thirrjes për bashkim dhe mobilizim qytetar në Prrenjas, në një takim të zhvilluar mbrëmjen e së shtunës në lulishten kryesore të qytetit.
Nisma u ndërmor nga anëtari i Këshillit Bashkiak të Prrenjasit, Ardit Facja, përmes një ftese publike të shpërndarë në rrjetet sociale, duke mbledhur dhjetëra qytetarë për të diskutuar mbi të ardhmen e zonës dhe sfidat që lidhen me reformën territoriale.
Takimi u shndërrua në një forum të hapur diskutimi, ku pjesëmarrësit shprehën shqetësimet e tyre dhe kërkuan një angazhim të përbashkët për mbrojtjen e interesave të komunitetit të Prrenjasit.
Qytetarët e pranishëm në takim theksuan se çështjet që lidhen me të ardhmen e Prrenjasit duhet të tejkalojnë përkatësitë politike, duke nënvizuar nevojën për një zë të përbashkët të komunitetit.
Një nga propozimet kryesore të diskutimit ishte krijimi i një aleance qytetare, e cila sipas organizatorëve do të synojë të shërbejë si një strukturë për mbrojtjen e interesave lokale dhe rritjen e përfshirjes së qytetarëve në proceset vendimmarrëse.
Takimi zhvillohet në një kohë kur në Prrenjas është rritur debati publik mbi të ardhmen administrative dhe zhvillimin e zonës. Qytetarë, përfaqësues vendorë dhe aktorë të komunitetit kanë kërkuar më shumë transparencë, dialog dhe përfshirje në vendimet që prekin të ardhmen e bashkisë.
Hapat e mëtejshëm të kësaj nisme mbeten për t’u parë, por organizatorët e konsiderojnë takimin e parë si një tregues të interesit dhe mbështetjes së qytetarëve për një angazhim më të madh komunitar në çështjet që lidhen me Prrenjasin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
