Apeli i Metës: Nuk është momenti për prova force, le të ulemi në dialog për një datë të re zgjedhjesh

Presidenti i Republikës, Ilir Meta, u bën apel palëve politike të reflektojnë sa më parë dhe të angazhohen në dialog për një datë të re zgjedhjesh.

Meta shprehet se nuk është momenti për retorikë përçarëse e provokuese, por për maturi.

Apeli i Metës vjen 10 ditë pas anulimit të datës së zgjedhjeve, kohë gjatë së cilës maxhoranca ka vijuar fushatën, duke mos njohur dekretin e kreut të shtetit.  

“U bënë dhjetë ditë që është në fuqi dekreti i Presidentit të Republikës për anulimin e datës së zgjedhjeve më datë 30 qershor, me qëllim qetësimin e situatës dhe krijimin e mundësive për dialog, që do të normalizonte situatën politike dhe do të krijonte mundësinë për një datë të re të zgjedhjeve vendore, gjithëpërfshirëse dhe demokratike. Theksoj sërish se nuk është kurrsesi momenti për prova force, për retorikë përçarëse dhe provokuese, por për maturi dhe përgjegjshmëri të lartë për interesat kombëtare të vendit dhe vazhdimësinë e integrimit evropian që është objektiv kombëtar i të gjithë shqiptarëve. Sërish insistoj me forcë rëndësinë e dialogut mes palëve e njëkohësisht gatishmërinë time për të kontribuar për një zgjidhje sa më të shpejtë”, shprehet Meta.