Vala e shtatë në Francë/ 200 mijë raste me Covid në ditë

Vazhdojnë të rriten infektimet ditore për shkak të valës së 7-të të Covid në Francë.

Sipas ministrit të ri të Shëndetësisë, François Braun, ka pasur mbi 200 000 në 24 orët e fundit, numri më i lartë i javëve të fundit.

Rajoni më i prekur është ai i Parisit, Ile-de-France, me 1 200 raste për 100 000 banorë.

Për ministrin, mbërritja e kulmit të epidemisë - megjithëse e pasigurt - mund të jetë brenda 2 ose 3 javësh. Megjithatë, numri prej 200 000 rastesh është shumë larg nga kulmi prej rreth 400 000 rastesh në ditë, i arritur në janar.

Ministri konfirmon se këto nënvariante nuk ndryshojnë nga të tjerat e njohura deri më tani të Omicron, jashtëzakonisht ngjitëse por më pak serioze se varianti origjinal. Vëzhgimi i kurbës së rritjes së rasteve në ditët e fundit, megjithatë, ka evidentuar një ngadalësim të lehtë të progresionit. Pacientët e shtruar në spital me Covid janë 16 638, me një mijë shtrime të reja çdo ditë (një rritje mjaft e qëndrueshme prej 30% çdo javë). Numri i të shtruarve në terapi intensive po rritet më pak, duke arritur në 978, me 90 pranime të reja çdo ditë.