Rifillon lëvizja në Kapshticë pas grevës në doganën greke, radhë të gjata automjetesh

Pas përfundimit të intervalit të pezullimit të lëvizjes, ka rifilluar qarkullimi i mjeteve në Pikën e Kalimit Kufitar të Kapshticës. 

Dhjetëra automjete të vogla, autobusë dhe kamionë kishin krijuar radhë në anën shqiptare, në pritje të hapjes së pikës kufitare greke për të hyrë në territorin e Greqisë. 

Menjëherë pas rifillimit të lëvizjes, autoritetet nisën përpunimin e mjeteve, ndërsa radha vijon të mbetet e gjatë për shkak të fluksit të krijuar gjatë orëve të bllokimit. 

Situata u shkaktua nga greva e punonjësve të doganës greke, e njoftuar dy ditë më parë, sipas së cilës këtë të hënë, nga ora 05:00 deri në 09:00, u pezullua përkohësisht funksionimi i pikës kufitare. 

Pas përfundimit të grevës, kalimi ka rifilluar, me përparësi për automjetet e vogla dhe autobusët.