Amsterdami ndalon ndërtimin e hoteleve të reja për të ngadalësuar turizmin

Qyteti holandez i Amsterdamit mund të ndalojë ndërtimin e hoteleve të reja.

Kështu tha këshilli i kryeqytetit, i cili të mërkurën e 17 prillit njoftoi se i gjithë qyteti do të bëhet e ashtuquajtura “no-zone” për hotelet e reja.

Synimi është luftimi i turizmit të tepërt. Për më tepër, numri i qëndrimeve në hotele në vit nuk duhet të kalojë 20 milionë.

Me këtë rregull, Amsterdami, siç raportohet nga gazeta holandeze De Telegraaf, do të eliminojë përjashtimet e fundit që ende lejonin ndërtimin e hoteleve të reja në qytet.

Tani, një hotel i ri do të lejohet vetëm nëse mbyllet një tjetër dhe nëse numri i shtretërve nuk rritet.

“Preferohet që hoteli i ri të jetë jashtë qendrës së qytetit. Për më tepër, duhet të ketë një përmirësim cilësor të hotelit, si modernizimi apo qëndrueshmëria”, sqaron bashkia.

Ditët e fundit po lindin disa hotele të reja pasi kishin marrë tashmë autorizimin më parë.