Organizatat e shoqërisë civile dhe përfaqësues të institucioneve shkencore e akademike në vend kanë kundërshtuar 2 vendimet e fundit të marra nga Këshilli i Ministrave në lidhje me zonat e mbrojtura. Në një shkresë të përbashkët, ata thonë se këto vendime reduktojnë me 11% sipërfaqet e mbrojtura ligatinore, duke rrezikuar dhe habitatet.
Ornitologu Mirjan Topi tha në studion e lajmeve të MCN TV se vendimet e qeverisë, në masën më të madhe nuk reflektojnë kërkesat e shoqërisë civile. Ai solli rastin e luginës së Vjosës.
Pashë deklaratën e ministres së Mjedisit, që propagandon. Statusi që ne kemi kërkuar për Vjosën është ai i parkut kombëtar dhe jo atij natyror. Ky i fundit është kategoria IV dhe ka regjim menaxhimi të ndryshëm. Në parqet kombëtare ndalohet ndërtimi i HEC, ndërsa për parkun natyror ligji nuk e thotë qartë. E njëjta gjë ka ndodhur me parkun e Munellës. E kërkuam park kombëtar, u shpall park natyror. Nuk po krijohet ndonjë mbrojtje e madhe. Këto më duken si përpjekje për të kamufluar gllabërimin e sipërfaqeve ligatinore.
Topi tha se rritja e sipërfaqeve të zonave të mbrojtura, e bërë me VKM, është e papërfillshme.
Janë shtuar 5 zona të mbrojtura të reja. Ndryshimi i sipërfaqes ka ndodhur për 27 zona dhe ndryshimi i kategorisë për 7 zona. Me këtë veprim nuk kemi më asnjë rezervat strik natyror në Shqipëri. Për një pjesë të zonave, rritja e sipërfaqes është e papërfillshme. P.sh. në Dardhë – Xhyra rritet me 0.3 ha. Nuk ka rritje sipërfaqeje në asnjë prej zonave për të cilat kjo rritje është thelbësore.
Sa i takon sipërfaqeve ligatinore, sipas Topit, ato përbëjnë 2.7% të sipërfaqes totale të vendit, por vetëm në 1.5% nga kjo pjesë mund të ndërtohet.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
