Vdes vëllai i vogël i themeluesit të Koresë së Veriut

Kim Yong Ju, vëllai më i vogël i themeluesit të Koresë së Veriut, Kim Il Sung, i cili dikur konsiderohej si zyrtari nr. 2 i vendit përpara se nipi i tij të mirohej si sundimtari i ardhshëm, ka vdekur, raportoi media shtetërore të mërkurën.

Udhëheqësi i Koresë së Veriut, Kim Jong Un, nipi i Kim Il Sung, shprehu "ngushëllime të thella" për vdekjen dhe dërgoi një kurorë ngushëllimi, njoftoi Agjencia Qendrore Koreane e Lajmeve.

"Kim Yong Ju luftoi me përkushtim për të zbatuar linjat dhe politikat e Partisë (Punëtores) dhe dha një kontribut në përshpejtimin e ndërtimit socialist dhe zhvillimin e sistemit shoqëror shtetëror të stilit korean, ndërsa punonte në poste të rëndësishme të partisë dhe shtetit për shumë vite.”, tha korrespodenti i KCNA.

Raporti i lajmeve nuk thoshte saktësisht se kur vdiq Kim Yong Ju. Sipas Ministrisë së Unifikimit të Seulit, ai ka lindur në vitin 1920, që do të thotë se ai ishte ose 100 ose 101 kur ndërroi jetë.

Tre breza të familjes Kim kanë sunduar Korenë e Veriut që kur Kim Il Sung themeloi vendin në vitin 1948. Kur Kim Il Sung vdiq në vitin 1994, djali i tij i madh, Kim Jong Il, trashëgoi pushtetin. Kim Jong Un është djali i tretë dhe më i vogël i Kim Jong Il dhe mori pushtetin pas vdekjes së babait të tij në 2011.

Gjatë sundimit të Kim Il Sung, shumë ekspertë të jashtëm e shihnin Kim Yong Ju si zyrtarin e dytë më të fuqishëm të Veriut apo edhe trashëgimtarin e vëllait të tij. Ai mbajti një sërë postesh të larta si drejtor i departamentit të organizimit dhe udhëzimit dhe anëtar i Byrosë Politike, të dyja në Partinë e Punëtorëve në pushtet. Në vitin 1972, ai përfaqësoi Korenë e Veriut në nënshkrimin e një marrëveshje paqeje historike me Korenë e Jugut, komunikata e parë e madhe e përbashkët e rivalëve mbi bashkimin.

Kim Yong Ju u zbeh gradualisht nga skena politike pasi Kim Jong Il mori postin e drejtorit të departamentit të Partisë së Punëtorëve në vitin 1973, një lëvizje e parë nga të huajt si një hap kyç në rrugën për të pasuar Kim Il Sung. Pozicioni i Kim Jong Il si pasardhës u bë publik në një kongres partie në vitin 1980.

Pas gati dy dekadash izolimi, Kim Yong Ju u bë zëvendëspresident dhe rifitoi anëtarësimin e tij në Byronë Politike në 1993. Emërimi erdhi pasi Kim Jong Il kishte siguruar statusin e tij si lider i ardhshëm dhe ekspertët thanë se Kim Yong Ju nuk kishte një rol të konsiderueshëm pushtet në çështjet kyçe të shtetit.

Më vonë ai shërbeu si nënkryetar nderi i komitetit të përhershëm të Asamblesë së Lartë Popullore, parlamentit të veriut dhe si delegat në Kuvend. Para raportit të së mërkurës për vdekjen e tij, aktiviteti i tij i fundit i njohur publik ishte në vitin 2015, kur televizioni shtetëror e tregoi atë duke u përkulur para portreteve të Kim Il Sung dhe Kim Jong Il pasi hodhi votën gjatë zgjedhjeve lokale.