Qinami është në prag të një konflikti që rrezikon të shkojë tek armët. Banorët e fshatit rrëfyen për emisionin “Fol” në MCN TV se ekziston një rrezik real pas projektit për vendosjen e parkut fotovoltaik në kullotat e fshatit ku kullosin çdo ditë mijëra kokë bagëti e disa qindra lopë.
Dhe kur preket buka e gojës, kur preket toka e brezave, tensioni shkon në pikën ku askush nuk e mban dot më.
Banorët thonë se janë lënë në terr informativ. Vendimi i Këshillit Bashkiak të Kolonjës për dhënien e kullotës për panele diellore është marrë pa dëgjesë, pa transparencë.
Ndërkohë, në fshatin Qinam asnjë shtëpi nuk ka certifikatë prone, as për tokat e as për objektet, ndërsa rrugët e fshatit janë të ndotura nga ujërat e zeza pasi mungojnë kanalizimet.
Dhe megjithatë, mbi këtë fshat pa minimumin e kushteve, kërkohet të ndërtohet një park energjie që prek drejtpërdrejt jetesën e tyre.
Në fshat ndjehet një presion i rëndë. Njerëzit janë të frikësuar, të zemëruar, e të tradhtuar nga institucionet. Shumë prej tyre e thonë hapur se situata po shkon drejt një pike të rrezikshme nëse nuk anulohet ne kohë projekti i parkut fotovoltaik që lë pa kullota blegtorinë dhe gjedhët e një fshati shume prodhues duke vënë në pikëpyetje edhe ekzistencën e tyre dhe familjeve fermere.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
