Janë të paktën 547 fëmijë që në disa dhjetëvjeçarë janë dhunuar dhe abuzuar në shkollën fetare të Ratisbonës, Gjermani. Sipas një raporti të përgatitur nga avokati Ulrich Weber, të cilit i referohen mediat gjermane, 500 fëmijë kanë pësuar dhunë fizike, ndërsa 67 të tjerë edhe dhunë seksuale.
Sipas raportit, abuzimet kanë ndodhur në harkun kohor 1953-1992 dhe për to janë identifikuar 49 autorë.
Fëmijët kanë qenë të gjithë pjesë e korit të kishës së Ratisbonës, që nga 1964 deri në 1993 është drejtuar nga vëllai i Papës Benedikti XVI, i cili hoqi dorë nga drejtimi i Kishës Katolike pak vite më parë. Në vitin 2010, Georg Ratzinger, kërkoi publikisht falje për dëmin që u është shkaktuar këtyre fëmijëve, për të cilin ai tha se nuk ka qenë kurrë në dijeni.
Në atë kohë peshkop i Ratisbonës dhe klerik i lartë në atë qytet, Gerhard Ludwig Muller, ka pranuar se ka pasur dijeni për abuzimet me fëmijët e korit, duke saktësuar që episodet e pedofilisë nuk përkojnë me kohën kur drejtimi ishte në dorë të profesor Ratzingerit.
Ndërsa vetë Georg Ratzinger në një intervistë ka pranuar se disa prej djemve të korit i kishin treguar si shkonin gjërat në shkollë, por historitë e tyre nuk e kishin bërë të mendonte se duhej të ndërhynte për diçka. Siç shkruante në vitin 2010 gazeta “Passauer Neuen Presse”, vëllai i madh i Papës ka pranuar se u ka dhënë ndonjë shpullë djemve të shkollës deri në vitet ’70 dhe është lehtësuar pasi ndëshkimi fizik u ndalua me ligj në fillim të viteve ’80.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
