Pacolli ofron avionin privat për udhëtimin e delegacionit të Kosovës në Shtëpinë e Bardhë

Ish-ministri i Jashtëm i Kosovës, Behgjet Pacolli, është i gatshëm të ndihmojë ekipin negociator të Kosovës me avionin e tij privat.

Siç raporton sot “Zëri”, këshilltari i Pacollit, Naim Murseli, ka thënë se aeroplani privat i kreut të AKR-së është edhe këtë herë në shërbim të vendit.

“Kur shtetit i mungojnë avionët, ne kemi një njeri të fortë, që e zgjidh atë shqetësim. Behgjet Pacolli, gjithmonë në shërbim të atdheut. Destinacioni i radhës: Washington DC”, ka shkruar Murseli në Facebook.

Më 27 qershor, delegacioni i Kosovës udhëton për në Uashington, ku pritet të takohet me delegacioni serb. Kosova shkon në tryezën e negociuar nga Richard Grenell e përfaqësuar nga presidenti Hashim Thaçi dhe kryeministri Avdullah Hoti.