Suedia ka dëbuar një gazetare kineze e cila kishte jetuar për 20 vite në këtë shtet.
Gruaja 57-vjeçare punonte si gazetare dhe dyshohet se kishte kontakte me ambasadën kineze dhe "njerëz të lidhur me qeverinë kineze", sipas transmetuesit publik suedez SVT. Emri i saj nuk bëhet i ditur.
“Policia e sigurisë ka argumentuar se mund të supozohet se klienti im mund të përbëjë një kërcënim serioz për sigurinë,” tha avokati shqiptar Leutrim Kadriu për gazetën. “Është e vështirë për mua të hyj në detaje të sakta, duke pasur parasysh se shumë gjëra janë të mbuluara me fshehtësi, pasi kjo është një çështje e sigurisë kombëtare.”
Klientja e Kadriut u arrestua në tetor dhe një gjykatë urdhëroi që ajo të deportohej javën e kaluar, tha ai për transmetuesin. Agjencia e Migracionit dhe Gjykata e Migracionit ranë dakord me qeverinë suedeze se ajo ishte një rrezik për sigurinë kombëtare, edhe pse ajo kishte kaluar dy dekada në vend, ishte martuar me një burrë suedez dhe kishte fëmijë me të, shtoi ai.
Ministri i Drejtësisë Gunnar Strommer i tha Reuters se gruaja humbi apelin e saj kundër dëbimit "sipas ligjit për kontrollin special të disa të huajve". Një zëdhënës i Shërbimit Suedez të Sigurisë (SAPO) tha se veprimet e tij ishin në përputhje me misionin e agjencisë "për të mbrojtur Suedinë dhe demokracinë".
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
