Një ngjarje e rëndë ka ndodhur mbrëmjen e sotme në Tiranë, në ambientet e brendshme të Komisariatit numër 3.
Gazetarja e MCN, Anduena Llabani raporton se një punonjës policie ka qëlluar me armën e shërbimit kolegun e tij.
Punonjësi është dërguar në spital në gjendje të rëndë, është shtetasi Çaush Saliasi, i cili është futur në sallë. Si pasojë e plagëve ka ndërruar jetë. Ndërsa autori është Ludian Zaimi, dhe ndodhet në komisariat.
Në vendin e ngjarjes kanë mbërritur grupet nga Drejtoria e Policisë në Tiranë, për të vijuar hetimet mbi rrethanat e ngjarjes.
Njoftimi i policisë:
Më datë 23.05.2022, rreth orës 21:20, në rrugën "Mine Peza", në ambientet e Komisariatit të Policisë Nr. 3, në rrethana ende të paqarta, punonjësi i Policisë, shtetasi L.Z., ka plagosur me armë zjarri shtetasin Ç.S., të dy me detyrë oficerë të Patrullës së Përgjithshme.
Si pasojë e plagëve të marra, punonjësi i Policisë Ç.S. ka ndërruar jetë në spital.
Grupi hetimor nën drejtimin e Agjencisë së Mbikëqyrjes Policore (AMP) dhe Prokurorisë së Tiranës, ndodhet në vendngjarje dhe po punon për sqarimin e rrethanave të ngjarjes.
Autori i dyshuar është ndaluar dhe po kryhen të gjitha veprimet hetimore për zbardhjen e rrethanave të ngjarjes.
Në ambientet e Komisariatit nr. 3 kanë shkuar një grup i posaçëm nga Drejtoria e Përgjithshme e Policisë së Shtetit, përfshirë ekspertë të Drejtorisë së Standardeve Profesionale dhe nga Departamenti i Rendit dhe Sigurisë Publike.
Në përfundim të veprimeve të para hetimore do të ketë një njoftim më të plotë për media.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
