Azovstal, simbol i rezistencës ukrainase

Fabrika e çelikut Azovstal është bërë një simbol i rezistencës ukrainase kundër pushtimit të Rusisë.

Qindra luftëtarë janë ngujuar në tunelet poshtë fabrikës masive industriale, duke mbrojtur fortesën e fundit ukrainase në qytetin e rrethuar të Mariupolit.

Qyteti port i vendosur strategjikisht u vu nën bombardime masive nga forcat ruse në fillim të pushtimit.

Marrja e qytetit do t'i lejonte ata të përfundonin një urë tokësore midis Krimesë dhe rajonit të Donbasit, si dhe t'i jepte Rusisë kontrollin e plotë të më shumë se 80% të vijës bregdetare të Ukrainës në Detin e Zi.

Ukraina thotë se bombardimet ruse dhe rrethimi i qytetit vranë dhjetëra mijëra njerëz, me raportime për trupa të shtrirë në rrugë. Moska mohon të ketë shënjestruar civilët.

I goditur me artileri dhe raketa, 90% e qytetit është dëmtuar ose shkatërruar, thonë zyrtarët ukrainas. Vetëm Azovstal qëndroi.

Mbrojtësit e saj kishin thënë se po "blenin kohë" për pjesën tjetër të Ukrainës për të luftuar forcat ruse dhe për të siguruar armët perëndimore të nevojshme për t'i bërë ballë sulmit të Rusisë.

Deri para 10 ditësh, në fabrikën e çelikut ishin strehuar edhe qindra civilë, me ushqim, ujë dhe ilaçe në mungesë.

U desh rreth një javë për të evakuuar gratë, fëmijët dhe të moshuarit që ishin bllokuar atje për më shumë se një muaj, në një operacion të koordinuar nga OKB dhe Kryqi i Kuq, i cili përfundoi më 7 maj.

Që atëherë, besohet se kanë mbetur vetëm luftëtarët, shumë prej tyre janë zotuar të vdesin duke luftuar në vend që të dorëzohen.