Zgjedhjet për kreun e degëve të PD-së/ MCN raporton nga Pogradeci dhe Shkodra për rezultatin final (VIDEO)

Partia Demokratike ka zhvilluar zgjedhje të brendshme në tre qytete, për drejtimin e degëve në Pogradec, Shkodër dhe Vlorë. 

Gara u mbajt këtë të diel, ku anëtarët votuan për të zgjedhur drejtuesit e rinj të degëve lokale.

Për “MCN Live”, korrespondentët Elsa Xhindole dhe Bendis Druni raportuan nga Pogradeci dhe Shkodra, duke dhënë një pasqyrë mbi mbarëvajtjen e procesit zgjedhor dhe rezultatet përfundimtare të votimit në këto degë të Partisë Demokratike.

Elsa Xhindole:

Në degën e Partisë Demokratike në Pogradec ka përfunduar procesi i votimit për zgjedhjen e kryetarit të ri të kësaj force politike në nivel lokal.

Në votim morën pjesë 476 anëtarë të Partisë Demokratike. Gara u zhvillua mes dy kandidatëve të njohur në strukturat e kësaj force politike në qytet: Kasëm Galla, i cili ka drejtuar degën e PD në Pogradec gjatë viteve 2019–2021 dhe njihet gjithashtu si biznesmen në zonë, si dhe Oligert Muçllari, drejtues i komanduar i degës pas procesit të primareve dhe me profesion ekonomist.

Procesi i votimit nisi në orën 08:00 të mëngjesit dhe u zhvillua në një atmosferë të qetë dhe pa asnjë problematikë. 

Nga numërimi i votave rezultoi se Oligert Muçllari ka marrë 247 vota, ndërsa kandidati tjetër, Kasëm Galla, ka siguruar 224 vota. Në këtë proces janë shpallur edhe 6 vota të pavlefshme.

 

Bendis Druni:

Ka përfunduar procesi i numërimit të votave për zgjedhjen e kryetarit të ri të degës së Partisë Demokratike në qarkun e Shkodrës. Çdo gjë ka shkuar mire dhe brenda normave ne vijimësinë e procesit. 

Nga rezultati i votimit, Ardit Qylybyli është shpallur fitues i garës përballë kandidatit tjetër, Gentian Ibro, duke siguruar shumicën e votave të anëtarësisë.

Në procesin e votimit për drejtimin e degës së PD Shkodër morën pjesë 1.781 anëtarë, të cilët votuan për të zgjedhur drejtuesin e ri të strukturës së partisë në këtë qark. Ardit Qylybyli mori 1060 vota, ndërsa 700 vota i siguroi Gent Ibro.

Procesi ka vijuar i qetë që prej mëngjesit, ndërsa me përfundimin e procesit të numërimit, Ardit Qylybyli merr zyrtarisht drejtimin e degës së Partisë Demokratike në Shkodër.