Irani zgjat dënimin me burg për nobelisten Narges Mohammadi

Gjykata Revolucionare e Iranit ka dënuar fituesen e çmimit Nobel për Paqe, Narges Mohammadi me 15 muaj burg shtesë.

Mohammadi ka kaluar tashmë 12 vjet në burg duke vuajtur dënime të shumta. Ajo akuzohet për përhapjen e propagandës kundër Republikës Islamike gjatë kohës që ishte në burg.

Familja e saj e dënoi vendimin, duke thënë se ky ishte dënimi i saj i pestë që nga marsi i vitit 2021.

Mohammadi nuk ishte e pranishme në gjykimin e fundit dhe vendimi u dha në mungesë të saj.

Narges Mohammadi ka bërë fushatë për të drejtat e njeriut në Iran për dekada. Ajo ka hyrë dhe dalë nga burgu për dy dekada për shkak të aktivizmit të saj. Ajo është arrestuar 13 herë dhe është dënuar me 31 vite burg në total.

Bashkë me muajt shtesë në burg, dënimi i ri e urdhëron Mohammadi të kalojë dy vjet në mërgim jashtë Teheranit.

Kjo do të thotë se ajo do të duhet të zhvendoset nga burgu famëkeq Evin ku ndodhet aktualisht.

Vendimi gjithashtu parashikon që pas vuajtjes së dënimit, Mohammadit do të ndalohej të udhëtonte jashtë vendit për dy vjet dhe do t’i ndalohej anëtarësimi në grupe politike dhe shoqërore dhe të kishte një telefon celular për të njëjtën kohëzgjatje.

Aktivistja 51-vjeçare për të drejtat e njeriut ka vazhduar punën e saj pavarësisht kërcënimeve dhe arrestimeve të shumta.

Ajo fitoi Çmimin Nobel për Paqen 2023 për punën e saj në luftën kundër shtypjes së grave në Iran.

Fëmijët e saj adoleshentë e pranuan çmimin në bashkinë e Oslos në tetor në emër të saj, pasi nuk e kishin parë nënën e tyre prej vitesh.

Fëmijët lexuan një fjalim që ishte nxjerrë nga burgu, ku Mohammadi denoncoi qeverinë “tiranike” të Iranit.

Unë e shkruaj këtë mesazh nga pas mureve të larta dhe të ftohta të një burgu. Populli iranian, me këmbëngulje, do të kapërcejë represionin dhe autoritarizmin.

Duke iu referuar protestave që filluan vitin e kaluar pas vdekjes së Mahsa Amini në paraburgim nga policia për gjoja se kishte veshur hixhabin e saj “në mënyrë të pahijshme”, Mohammadi tha se të rinjtë iranianë kishin “transformuar rrugët dhe hapësirat publike në një vend të rezistencës së gjerë civile”.