Katër të burgosur humbën jetën dhe 61 të tjerë mbetën të plagosur pas zjarrit që shpërtheu dje në burgun Evin të Iranit.
Një lajm i tillë është bërë i ditur nga autoriteti gjyqësor iranian, siç raportojnë mediat ndërkombëtare.
Të burgosurit ishin pjesë e seksionit të posaçëm të të dënuarve për grabitje dhe krime financiare, të cilët humbën jetën si pasojë e asfiksisë nga tymi i shkaktuar nga zjarri i ndezur në punishten e rrobaqepësisë së burgut.
Dhjetë nga të plagosur u shtruan në spital, ndërsa 51 të tjerët në ambulancën e burgut.
Sipas agjencisë së lajmeve Irna, gjatë përplasjeve dhe zjarrit të djeshëm, disa të burgosur tentuan të arratiseshin, por u bllokuan nga policia.
Zjarri shpërtheu ndërsa brenda burgut u zhvilluan një trazirë dhe disa përleshje të shkaktuara nga një grup të burgosurish të akuzuar për grabitje.
Sipas prokurorit të Teheranit, situata nuk ka lidhje me protestat e vazhdueshme në Iran, sepse zona ku shpërthyen përleshjet është e ndarë nga ajo ku mbahen të burgosurit politikë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
