Tre persona janë arrestuar në kuadër të operacionit të koduar “Rotondo”, i zhvilluar nga Seksioni për Hetimin e Narkotikëve në bashkëpunim me Forcën e Posaçme “Shqiponja” dhe Seksionin e Mbështetjes Operacionale të Hetimit, për goditjen e veprimtarisë kriminale në fushën e shpërndarjes së lëndëve narkotike.
Si rezultat i administrimit të shpejtë të informacioneve të siguruara në rrugë operative, u goditën tre raste të shpërndarjes së lëndëve narkotike në qytetin e Shkodër.
Në pranga u vunë shtetasit: K. Gj., 27 vjeç, banues në fshatin Bregu i Lumit, Shkodër; F. N., 26 vjeç, banues në fshatin Hot i Ri dhe J. Ç., 25 vjeç, banues në Shkodër.
Shtetasi K. Gj. u kap në flagrancë në rrethrrotullimin e fshatit Stom Golem, duke lëvizur me automjet tip “Land Rover”. Gjatë kontrollit iu gjet një sasi lënde narkotike kanabis, ndërsa në çantën e tij u konstatua edhe një mjet prerës (thikë).
Ndërkohë, shtetasi F. N. u kap në sheshin “Luigj Gurakuqi”, ku gjatë kontrollit fizik iu sekuestrua një sasi kanabisi e ndarë në doza, gati për shitje.
Po ashtu, shtetasi J. Ç. u arrestua në sheshin “Nënë Tereza”, ku gjatë kontrollit iu gjet dhe sekuestrua lëndë narkotike kanabis e ndarë në doza.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
