Bota ka shënuar rekord të rasteve të reja për të tretën ditë radhazi. Organizata Botërore e Shëndetësisë (OBSH) raporton në faqen e saj se 383 359 raste të reja u regjistruan dje, 7.9% më shumë se 355 244 që ishin të premten.

Të enjten e kaluar u shënua një kulm i ri, me 343 467 infeksione. Siç dihet, dje numri i rasteve në botë tejkaloi pragun prej 37 milionë dhe sipas Universitetit Johns Hopkins totali aktualisht qëndron në 37 105 925, duke përfshirë 1 071 388 vdekje.

Edhe Evropa dje regjistroi rekordin e dytë rresht ditor të rasteve të koronavirusit. Sipas OBSH-së, në 24 orët e fundit ka pasur 123 684 infeksione, rreth 8.3% më shumë se rekordi i mëparshëm i 114 227 rasteve të regjistruara të premten. Sipas llogaritjeve të OBSH-së, numri i përgjithshëm i infeksioneve në Evropë aktualisht është 6 809 678.

India tejkalon 7 milionë të infektuar. Shifrat e fundit nga Ministria e Shëndetësisë treguan një rritje prej gati 75 000 rastesh në 24 orët e fundit, duke e çuar totalin në 7.05 milionë. Në Shtetet e Bashkuara, numri total i të infektuarve arriti në 7.67 milionë.