Shirat e dendur që përfshinë kryeqytetin rreth dy muaj më parë, përveçse bllokuan rrugët nga vërshimi i ujërave, përmbytën edhe katin e parë të Bashkisë së Tiranës.
Edhe pse kanalizimet në qendrën e kryeqytetit ishin të reja për shkak të punimeve gjatë ndërtimit të sheshit “Skënderbej”, uji i shirave të rrëmbyeshëm vërshoi nga të gjitha anët. Për tërheqjen e ujit nga ambientet e brendshme të bashkisë është dashur ndërhyrja e skuadrave të zjarrfikëses dhe UKT-së.
"TemA Tv" i dërgoi disa pyetje bashkisë më datë 30.07.2018 lidhur me përmbytjen e katit të parë të këtij institucioni, ndërsa përgjigja ka ardhur më datën 22.08.2018.
Në përgjigjen e saj, Bashkia e Tiranës bën me dije se "ka ngritur grupin e konstatimit dhe verifikimit të dëmit dhe nga ky grup janë analizuar të gjitha shkaqet e përmbytjes së katit nën tokë të ambienteve të Bashkisë Tiranë, për të cilin është hartuar raporti përfundimtar, ku i është vënë në dispozicion kryetarit të Bashkisë Tiranë".
“Respublica.al” publikoi një foto, ku duket korridori i bashkisë në të cilin janë varur për t’u tharë disa dokumente të cilat ishin lagur nga uji që përmbyti katin e parë.
Ngjarja u denoncua edhe nga kryetari i Këshillit Bashkiak i Partisë Demokratike, Kreshnik Çollaku. “Burime nga brenda Bashkisë na njoftojnë se janë dëmtuar rëndë sallat dhe dokumentacionet e arkivës, gjendjes civile dhe biblioteka", shkruante Çollaku.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
