Pakti 100-vjeçar, Britania do të mbështesë Ukrainën edhe pas përfundimit të konfliktit

<p>Kryeministri britanik, Keir Starmer, vizitoi Ukrainën, të cilës i premtoi mbështetje të gjatë. Vizita e Starmer vjen në një moment kur në Ukrainë janë shtuar shqetësimet se presidenti i sapozgjedhur i SHBA-së, Donald Trump mund të reduktojë potencialisht ndihmën për vendin në luftë.</p> <p>Presidenti ukrainas, Zelensky, po kërkon të forcojë garancitë e sigurisë nga aleatët kryesorë pasi ka shqetësime se SHBA - e cila është mbështetësi më i madh financiar i Ukrainës - mund të fillojë ta shtyjë Ukrainën për të bërë paqe me Rusinë.</p> <p>Sipas <a href="https://www.bbc.com/news/articles/cvgem31jekvo">BBC,</a> Starmer u zotua të angazhojë më shumë mbështetje për Ukrainën në përpjekjet e saj të vazhdueshme të luftës kundër Rusisë – të cilën ajo e ka luftuar që nga shkurti 2022.</p> <p>"Ne jemi me ju jo vetëm sot, për këtë vit apo tjetrin - por për 100 vjet - shumë kohë pasi kjo luftë e tmerrshme të ketë mbaruar dhe Ukraina të jetë e lirë dhe të lulëzojë përsëri," i tha ai Zelenskit.</p> <p>Ai shtoi se Mbretëria e Bashkuar do të punojë me të gjithë aleatët e saj për të siguruar që çdo marrëveshje që i jep fund luftës të jetë mjaftueshëm e fortë për të "garantuar sigurinë e Ukrainës, për të garantuar çdo paqe të mundshme dhe për të penguar çdo agresion të ardhshëm".</p> <p>Zelensky ka kërkuar më parë që Mbretëria e Bashkuar, si dhe aleatët e tjerë evropianë si Franca, të dërgojnë trupa në Ukrainë për një operacion paqeruajtës pas luftës.</p> <p>Megjithatë, Starmer nuk e dha një premtim të tillë. "Është vërtet e rëndësishme që Ukraina të vihet në pozicionin më të fortë të mundshëm", ishte përgjigjja që ai u dha gazetarëve kur u pyet për këtë.</p> <p>Premtimet e fundit bazohen në 12.8 miliardë paund mbështetje që Mbretëria e Bashkuar i ka dhënë tashmë Ukrainës. Ajo gjithashtu është angazhuar tashmë t'i japë vendit 3 miliardë paund ndihmë ushtarake çdo vit për "për aq kohë sa duhet".</p> <p>Pakti i së enjtes zyrtarizon mbështetjen ekonomike dhe ushtarake që Mbretëria e Bashkuar i kishte premtuar Ukrainës. Përveç mbështetjes ushtarake, duke përfshirë shpërndarjen e një sistemi të ri të mbrojtjes ajrore të lëvizshme që do të projektohet në MB dhe financohet nga Danimarka, marrëveshja përfshin ndihmën ekonomike, mbështetjen për kujdesin shëndetësor dhe rritjen e bashkëpunimit ushtarak për sigurinë detare dhe teknologjinë e dronëve.</p> <p>Mbretëria e Bashkuar do të vazhdojë gjithashtu të trajnojë trupat ukrainase. Më shumë se 50 000 janë trajnuar në tokën britanike gjatë konfliktit deri më tani.</p>