“Europa ka një nga parimet e saj më të rëndësishme, të ndihmoj njerëzit që rrezikojnë jetën e tyre” – ky ishte gjykimi i shkrimtarit dhe studiuesit Pirro Misha për “Kontinentin e vjetër” shprehur në emision “Zululand” të gazetarit Mustafa Nano, kur u pyet për ardhjen e refugjatëve nga Lindja e Mesme.
Misha e Nano diskutuan mbi krizën e BE-së dhe mbi faktorët që e nxisin apo e ekspozojnë atë, si largimi i mundshëm prej BE-së i Britanisë së Madhe; refugjatët arabë e myslimanë; zgjerimi i BE-së; presioni prej zhvillimeve jodemokratike nga brenda (Hungaria, Polonia); presioni prej zhvillimeve nga jashtë (Turqia, Rusia); mos integrimi i pakicave myslimane, etje.
Po përtej fenomenit të dyndjes së refugjatëve, Misha dhe Nano u ndalën tek marrëdhënia e Europës me Turqinë.
“Marrëdhënia BE – Turqi është një marrëdhënie komplekse e orientuar jo vetëm nga historia por, sidomos nga vendndodhja e saj gjeografike mes dy kontinenteve megjithatë Europa mbetet gjithmonë e rëndësishme për Turqinë” – theksoi Misha në Zululand.
Sipas tij, pozicioni ndërkombëtar i Turqisë është më i dobët se kurrë dhe politikat e Erdoganit ndodhen në një moment udhëkryqi, i cili është i rëndësishëm për t’u zgjidhur jo vetëm për Turqinë por edhe për Ballkanin dhe Europën. Madje studiuesi Misha tha se “Premtimet që BE i ka bërë Turqisë janë të pamundura”.
Lidhur me Shqipërinë dhe shqiptarët, Pirro Misha u shpreh se shqiptarët janë pjesë e Ballkanit dhe Europës dhe se aty qëndron e ardhmja. “Në jetën e individit nuk ka rëndësi se çfarë ke qenë por çfarë do të bëhesh! Shqiptaret ëndërrojnë të bëhen si europianet edhe pse rruga është e veshtire” – tha studiuesi Misha në “Zululand”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
