Vajza vrau babanë në Fier/ Arrestohet një i dyshuar si bashkëpunëtor në krim

26-vjeçarja Ermalinda Rama dyshohet se ka bashkëpunuar me një tjetër person për vrasjen e babait të saj Anesti Rama. 

Policia ka arrestuar sot një 55-vjeçar me inicialet Ç. D. banues në fshatin Arapaj. 

Ai dyshohet se ka bashkëpunuar me autoren në vrasjen e babait të saj nëpërmjet strangulimit (mbytje me tel), si edhe duke përdorur sende të forta dhe mjete prerëse.

“Punë e pandërprerë hetimore për zbardhjen e plotë të rrethanave të ngjarjes së ndodhur në fshatin Frashër, ku shtetasja E. R. vrau për motive të dobëta, babanë e saj.

Vihet në pranga bashkëpuntori i 26-vjeçares. Në vijim të hetimeve të kryera me qëllim dokumentimin e plotë të rrethanave të ngjarjes, specialistët e Seksionit për Hetimin e Krimeve Kundër Personit të Drejtorisë Vendore të Policisë Fier bënë ndalimin e shtetasit Ç. D., 55 vjeç, banues në fshatin Arapaj, Roskovec.

Nga kryerja e hetimeve dyshohet se ky shtetas ka bashkëpunuar me shtetasen E. R., në vrasjen e babait të saj nëpërmjet strangulimit (mbytje me tel), si edhe duke përdorur sende të forta dhe mjete prerëse”.

Materialet procedurale iu referuan Prokurorisë së Fierit, për veprime të mëtejshme.