Kryeministri i Kosovës, Avdullah Hoti, ka raportuar në Kuvend lidhur me marrëveshjen e nënshkruar me Serbinë më 4 shtator në Shtëpinë e Bardhë.
Hoti tha se marrëveshja nuk është perfekte, por as Kosova nuk ka humbur asgjë.
“Kosova nuk humb asgjë, marrëveshja nuk është perfekte sepse do të ishte e tillë sikur ta kishim mbyllur me njohje reciproke dhe të ecnim përpara në integrimet euroatlantike. Marrëveshja i sjell Kosovës, 1 miliardë dollarë, njohje nga Izraeli, partneritetin më të fuqishëm që ka pasur Kosova me SHBA-të dhe ajo që është më e rëndësishme përfshirjen e plotë të SHBA në bisedime. Nuk e kemi pranuar minishengenin e Novi Sadit, e kemi kundërshtuar, e kemi pranuar minishengenin e Uashingtonit si palë e barabart e kësaj marrëveshjeje”, ka thënë Hoti.
Lidhur me çështjen e asociacionit të komunave serbe, për të cilën presidenti Thaçi kërkoi një rezolutë nga Kuvendi që e ndalon si temë në bisedimet e Brukselit, Hoti tha se një pikë e tillë nuk do të diskutohet.
“Asociacionin nuk jam duke e negociuar, kjo qeveri nuk e ka hapur as nuk do ta hapë temën e asociacionit. Sot është cilësuar si një ditë e rrezikshme, po e shihni se është një ditë normale me diell ku po diskutohet në Kuvend”, ka thënë kreu i qeverisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
