Luftimet e vazhdueshme në kryeqytetin e Sudanit tani po prekin rëndë furnizimet me ushqime, si dhe po ndërpresin aksesin në ujë dhe energji elektrike, sipas banorëve të Khartoum. "Ne kemi vetëm ushqim të mjaftueshëm për dy ditë," tha Nisreen Al-Saim.
Zonja Saim shtoi se ajo dhe familja e saj tani po reduktojnë sasinë e ushqimit që konsumojnë me shpresën se furnizimet e tyre zgjasin më shumë.
Ndërprerjet e ujit dhe energjisë elektrike kanë prekur shumë shtëpi sudaneze që nga fillimi i përleshjeve midis grupit paraushtarak të Forcave të Mbështetjes së Shpejtë (RSF) dhe ushtrisë sudaneze më 15 prill.
Të dy palët kishin ndarë pushtetin me kreun e ushtrisë, gjeneralin Abdel Fattah al-Burhan, si udhëheqës de fakto dhe kreun e RSF-së, Mohamed Hamdan Dagalo si zëvendës të tij, por që atëherë ata kanë filluar të luftojnë njëri-tjetrin.
Më shumë se 270 njerëz kishin vdekur, sipas një deklarate nga ambasada amerikane në Khartoum. Në Bahri, Khartoum verior, dëshmitarët okularë i thanë BBC-së se stacioni kryesor i pompimit të ujit ishte goditur.
Hind, një banore vendase, tha se ndërprerjet e shpeshta të ujit e detyruan atë dhe familjen e saj të mbështeteshin vetëm në rezervat e tyre të abri, një pije me bazë misri që zakonisht konsumohet gjatë Ramazanit, për të shuar etjen.
Hind shtoi se të gjitha dyqanet në lagjen e saj ishin mbyllur, përveç disa furrave buke, madje atyre u kishte mbetur pak miell. Disa ditë para fillimit të luftimeve, ushtria kishte paralajmëruar civilët që të grumbullonin ushqime pas dislokimit të personelit të RSF-së në pika të ndryshme të kryeqytetit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
