Kreu i Lëvizjes Vetëvendosje, Albin Kurti, i është drejtuar me një letër presidentit Hashim Thaçi, të cilit i kërkon të mos bëjë vlerësime politike dhe presion përmes paragjykimit të procesit politik të formimit të qeverisë. Kurti shprehet në letër se proces në fjalë është i përcaktuar qartë me Kushtetutë dhe i sqaruar në hollësi me aktgjykime të Gjykatës Kushtetuese dhe në të tilla kushte, presidenti nuk mund të bëjë interpretime shtesë.
Lidhur me mandatimin e kryeministrit, hap për të cilin Thaçi i la Kurtit vetëm 48 orë kohë, kreu i Vetëvendosjes shkruan se Kushtetuta nuk i njeh presidentit të republikës asnjë autoritet për të ushtruar një vetemërim, vetësugjerim për emërim ose vetëpërcaktim të kandidatit që përfaqëson vullnetin e subjektit politik fitues të zgjedhjeve.
Lidhur me rolin e kreut të shtetit në procesin e krijimit të qeverisë së re, Kurti thotë se ai është pasiv përgjatë gjithë procesit dhe vetëm formalisht mandaton një kandidat pasi atij i dërgohet emri nga subjekti që ka shumicën parlamentare.
Në letër, Kurti thotë se VV po e përdor kohën për të ndërtuar një koalicion të qëndrueshëmdhe nuk ka aspak për qëllim të cenojë autoritetin e presidentit.
Lidhur me bisedimet që Vetëvendosje po zhvillon me LDK-në, Kurti shprehet se marrëveshja është në fazën e finalizimit dhe në një të ardhme të afërt presidentit do t’i dërgohet zyrtarisht emri i kryeministrit të ri të Kosovës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
