700 familje shqiptare rrezikojnë dëbimin nga Britania? Hasani: Bëhet fjalë për persona që u ka mbaruar çdo mundësi ligjore për të qëndruar (VIDEO)

Ministrja e Brendshme e Britanisë së Madhe, Shabana Mahmood, ka paraqitur një plan të gjerë për ristrukturimin e sistemit të azilit. 

Sipas saj, rreth 700 familje shqiptare, përfshirë fëmijë, të cilave u është refuzuar azili, po strehohen aktualisht në Britani dhe qëndrimi i tyre financohet nga taksat e qytetarëve.

I ftuar në “MCN Live”, avokati i emigracionit në Mbretërinë e Bashkuar, Naim Hasani, tha se me shumë gjasë bëhet fjalë për familje të cilave u ka përfunduar çdo mundësi ligjore për të qëndruar në vend.

Ministrja Mahmood ka surprizuar edhe deputetët britanikë me propozimet e saj gjatë dy ditëve të para në detyrë, pasi paketa e re për emigracionin përmban masa të forta, që synojnë ndalimin e kalimeve të paligjshme me gomone nga Franca drejt Britanisë.

Masat e reja, sqaron Hasani, pritet të ndikojnë edhe tek ata që kërkojnë status afatgjatë qëndrimi.

Me propozimet e reja, marrja e lejes së qëndrimit afatgjatë do të jetë shumë më e vështirë. 

Në vend të aplikimeve çdo 2 vjet e gjysmë, një person mund të detyrohet të aplikojë deri në 8 herë përpara se të marrë të drejtën e qëndrimit përgjithmonë, që i bie rreth 20 vjet. 

Këto janë politika ekstreme. 

Ai shtoi se qeveria britanike ka deklaruar se do të rikthejë politikën e dëbimeve të detyruara për emigrantët të cilëve u ka mbaruar çdo e drejtë ligjore.

Nëse të kanë shteruar të gjitha mundësitë ligjore dhe nuk ke më bazë për të qëndruar në Mbretërinë e Bashkuar, atëherë nuk ke asnjë të drejtë të mbetesh. 

Ministrja ka thënë se në këto raste dhe ajo përmend rreth 700 familje shqiptare, do të veprohet me forcën e ligjit nëse nuk largohen vullnetarisht.

Debati është ndezur edhe në mediat britanike, të cilat kërkojnë të dinë se ku ndodhen këto familje, por numri real është më i madh.
Ka sa e sa familje tjera nga komunitete të ndryshme.

 Por Shqipëria shihet tashmë si vend i sigurt, vend kandidat për BE, vend anëtar i NATO-s, ndaj qeveria britanike konsideron se nuk ka arsye që shqiptarët të kërkojnë azil.