Presidenti Thaçi synon t’ia kufizojë kryeministrit Hoti çështjet që do të negociohen në Bruksel. Me anë të një kërkese urgjente drejtuar Parlamentit, Thaçi kërkon votimin e një rezolute që i ndalon kryeministrit Avdullah Hoti të negociojë për çështje të brendshme të Kosovës dhe tema që rrezikojnë rendin e brendshëm shtetëror.
“Kuvendi i Kosovës duhet urgjentisht ta trajtojë këtë hap të rrezikshëm të Qeverisë së Kosovës në dialogun e Brukselit. Po ashtu, urgjentisht duhet ta votojë edhe një rezolutë, me të cilën kryeministrit i ndalohet të negociojë për çështje të brendshme të Kosovës dhe për tema që rrezikojnë rendin e brendshëm shtetëror”, shkruan në deklaratën e shtypit, të lëshuar nga Zyra e Presidentit, Hashim Thaçi.
Thaçi e cilëson “gabim të madh dhe të rrezikshëm” hapjen e temave për të drejtat e komuniteteve dhe për Asociacionin e komunave serbe në dialogun e Brukselit.
“Është goditje ndaj shtetësisë dhe cenim i sovranitetit të shtetit tonë. Këto tema janë adresuar dhe zgjidhur në kuadër të Pakos së Ahtisaarit, e cila i parapriu shpalljes së pavarësisë, por edhe në kuadër të Marrëveshjes së Brukselit në prillin të vitit 2013 dhe me vendimin e Gjykatës Kushtetuese. Prandaj, askush nuk ka mandat që të bisedojë në emër të Kosovës për tema të mbyllura, në Bruksel apo kudoqoftë. Kosova nuk mund dhe me asnjë çmim asnjëherë nuk do të lejojë që brenda territorit të saj të krijohet një entitet politik, i cili do të ishte riprodhim i Republikës Serbe në territorin e Kosovës”, thuhet në deklaratë.
Për kreun e shtetit, diskutimi për Asociacionin paraqet fillimin e instalimit të Republikës Serbe brenda Republikës së Kosovës.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
