Turqia mbyll Instagramin

<p>Autoriteti i komunikimit në Turqi ka bllokuar aksesin në platformën e mediave sociale Instagram.</p> <p>Zyrtarisht nuk u dha asnjë arsyetim për këtë vendim, por gazeta Yeni Safak, e cila është e afërt me qeverinë, raportoi se aksesi u bllokua si përgjigje ndaj Instagramit që fshinte postimet e përdoruesve turq që shprehnin ngushëllime për vrasjen e liderit politik të Hamasit, Ismail Haniyeh.</p> <p><em>“Sanksionet për politikën e ndërprerjes së rrjetit Instagram ishin të shpejta. Autoriteti i Teknologjive të Informacionit dhe Komunikimit bllokoi aksesin në Instagram</em>”, deklaroi Yeni Safak në edicionin e saj online.</p> <p>Më herët, Fahrettin Altun, drejtori i komunikimit presidencial dhe ndihmës i Presidentit Recep Tayyip Erdogan, kishte kritikuar ashpër platformën në pronësi të Meta, duke u shprehur se po pengonte përdoruesit në Turqi të postonin mesazhe ngushëllimi për Haniyeh.</p> <p>Instagram ka mbi 50 milionë përdorues në Turqi, vendi me popullsi prej 85 milionë banorësh.</p> <p>Ndryshe nga aleatët e saj perëndimorë, Turqia nuk e konsideron Hamasin si një organizatë terroriste. Një kritik i fortë i veprimeve ushtarake të Izraelit në Gaza, Erdogan e ka përshkruar grupin si "<em>luftëtarë çlirimtarë</em>".</p> <p>Në Turqi, 2 gushti është ditë zie për vrasjen e liderit të Hamasit, Haniyeh.</p> <p>Ndërkohë, opozita e kundërshton vendimin e autoriteteve turke për të mbyllur aksesin në Instagram. &nbsp;Ekrem Imamoglu, kryebashkiaku i Stambollit, partisë kryesore opozitare të Turqisë, tha se Autoriteti i Komunikimit po vepron si një "njësi censurimi".</p> <p>"<em>Mediat sociale janë një platformë që të gjithë e përdorin për shumë qëllime, duke përfshirë për tregti dhe komunikim</em>," shkroi Imamoglu në X. "<em>Është e papranueshme që një platformë e përdorur nga i gjithë vendi të mbyllet në mënyrë arbitrare një mëngjes</em>."</p> <p>Turqia ka një histori të censurimit të mediave sociale dhe faqeve të internetit. Qindra mijëra domene janë bllokuar që nga viti 2022, sipas Shoqatës për Lirinë e Shprehjes, një organizatë jofitimprurëse që rigrupon avokatët dhe aktivistët e të drejtave të njeriut. Platforma YouTube u bllokua nga 2007 deri në 2010.</p>