Nis sot në Tiranë takimi i 22-të i Komitetit Parlamentar të Stabilizim-Asociimit (KPSA) BE-Shqipëri.
Punimet e takimit do të nisin në orën 10:00 dhe do të drejtohen nga bashkëkryetarët e delegacioneve, Taulant Balla, në cilësinë e kreut të delegacionit të Kuvendit të Shqipërisë, dhe Marco Tarquinio, kreu i delegacionit të Parlamentit Evropian.
Takimi do të përshëndetet edhe nga Kryetari i Kuvendit, Niko Peleshi.
Në takimin dyditor do të marrin pjesë edhe eurodeputetët e grupit të Konservatorëve dhe Reformistëve Evropianë (ECR), Chiara Gemma dhe Cristian Terheș. Gemma është nënkryetare e delegacionit të Parlamentit Evropian për Komitetin Parlamentar të Stabilizim-Asociimit BE-Shqipëri.
Takimi i KPSA-së zhvillohet në kuadër të mekanizmit të bashkëpunimit parlamentar mes Shqipërisë dhe Bashkimit Evropian dhe vjen pas mbledhjes së 21-të, e cila u zhvillua më 8-9 korrik në Strasburg.
Sipas Parlamentit Evropian, në axhendën e takimeve të KPSA-së përfshihen çështje të lidhura me procesin e integrimit të Shqipërisë në BE, shtetin e së drejtës, të drejtat themelore, luftën kundër krimit të organizuar dhe korrupsionit, liritë e medias, zhvillimin e qëndrueshëm dhe bashkëpunimin rajonal.
Grupi ECR ka rikonfirmuar mbështetjen e tij për rrugëtimin evropian të vendit, duke e cilësuar Shqipërinë si një partner strategjik për sigurinë dhe stabilitetin rajonal, edhe në kuadër të anëtarësimit të saj në NATO.
Komiteti Parlamentar i Stabilizim-Asociimit BE-Shqipëri është mekanizëm i bashkëpunimit parlamentar mes Shqipërisë dhe Bashkimit Evropian dhe zhvillon dy takime në vit, një në Shqipëri dhe një në Bruksel ose Strasburg.
Takimi i 22-të mbahet edhe nesër në Tiranë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
