Australia deklaroi të martën se do të kufizojë numrin e regjistrimit të studentëve të rinj ndërkombëtarë në 270.000 për vitin 2025, pasi qeveria kërkon të frenojë emigrimin rekord që ka kontribuar në një rritje të çmimeve të qirave të shtëpive.
Vendimi vjen pas një sërë veprimesh që nga viti i kaluar për t’i dhënë fund koncesioneve të periudhës së COVID për studentët dhe punëtorët e huaj në Australi të cilët ndihmuan bizneset të rekrutojnë staf në vend, ndërsa kontrollet e rrepta kufitare i mbanin punëtorëve jashtë shtetit.
“Ka rreth 10 për qind më shumë studentë ndërkombëtarë në universitetet tona sot sesa përpara pandemisë dhe rreth 50 për qind më shumë në ofruesit tanë privatë të profesioneve dhe trajnimeve”, tha ministri i Arsimit Jason Clare në një konferencë për mediat.
Regjistrimet e reja të studentëve ndërkombëtarë do të kufizohen në 145.000 për universitetet, që është rreth niveleve të vitit 2023, dhe 95.000 për kurset praktike dhe të bazuara në aftësi.
Clare shtoi se qeveria do të informojë universitetet për kufijtë e tyre specifikë të regjistrimit.
Universitetet e Australisë thanë se masa e qeverisë do të zbatonte një frenim në sektor.
“Ne e pranojmë të drejtën e qeverisë për të kontrolluar numrin e migracionit, por kjo nuk duhet të bëhet në kurriz të një sektori të vetëm, veçanërisht të një sektori aq të rëndësishëm ekonomikisht sa arsimi”, tha në një deklaratë kryetari i Universitetit të Australisë, profesor David Lloyd.
Arsimi ndërkombëtar, eksporti i katërt më i madh i Australisë pas mineralit të hekurit, gazit dhe qymyrit, kishte vlerë 36.4 miliardë dollarë australianë për ekonominë në vitin financiar 2022-2023.
Emigracioni arriti një rekord të lartë deri më 30 shtator 2023, duke u rritur me 60 për qind në një rekord prej 548.800, kryesisht i nxitur nga studentë nga India, Kina dhe Filipinet. Kjo shifër ishte më e lartë se 518.000 persona në vitin që përfundoi në qershor 2023.
Në përpjekje për të frenuar rritjen e migracionit, qeveria muajin e kaluar më shumë se dyfishoi tarifën e vizave për studentët e huaj dhe u zotua të mbyllte boshllëqet në rregullat që i lejonin të zgjasin vazhdimisht qëndrimin e tyre.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
