Një gjykatë italiane dënoi ditën e sotme ish-ministrin e Jashtëm Gianfranco Fini me dy vjet e tetë muaj burg për pastrim parash, lidhur me rolin e tij në shitjen e një apartamenti në Monte Carlo nga partia e tij politike.
Elisabetta Tulliani, partnerja e Finit, u dënua me pesë vjet burg nga gjykata në Romë, ndërsa vëllai i saj Giancarlo Tulliani u dënua me gjashtë vjet dhe babai i tyre Sergio Tulliani me pesë vjet.
Prokuroria gjatë aktakuzës kishte kërkuar 8 vjet burgim për ish-ministrin italian, i cili ishte i pranishëm në sallën e gjyqit.
Hetimi i prokurorisë u thellua rreth shitjes së një apartamenti në Monte Carlo, e lënë trashëgim nga kontesha Annamaria Colleoni për Aleancën Kombëtare, parti e cila drejtohej nga Fini.
Sipas prokurorisë, prona ishte blerë nga Giancarlo Tulliani, kunati i Finit, nëpërmjet kompanive offshore në vitin 2008, për rreth 300 mijë euro.
Në vitin 2015, shtëpia u rishit për 1 milion e 360 mijë dollarë prej nga vjen dhe akuza e pastrimit të parave për të gjithë të pandehurit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
